Gujarat Rain : પંચમહાલના હાલોલમાં 10 ઇંચ વરસાદ, નર્મદા ડેમ 94 ટકા ભરાયો

Gujarat Rain Weather Forecast Update : ગુજરાતમાં વરસાદની ધમાકેદાર બેટિંગ જોવા મળી રહી છે. શનિવારને 30 ઓગસ્ટના રોજ સવારના 6.00 થી સાંજના 4.00 વાગ્યા સુધીમાં 95 તાલુકામાં વરસાદ નોંધાયો છે. જેમાં સૌથી વધારે પંચમહાલના હોલોલમાં 10 ઇંચ વરસાદ વરસ્યો છે.

► 29 તાલુકામાં એક ઇંચથી વધારે વરસાદ

સ્ટેટ ઇમરજન્સી ઓપરેશન સેન્ટર, ગાંધીનગરના આંકડા પ્રમાણે રાજ્યમાં શનિવારને 30 ઓગસ્ટના રોજ સવારના 6 થી સાંજના 4 વાગ્યા સુધીમાં 95 તાલુકામાં વરસાદ વરસ્યો છે. 29 તાલુકામાં એક ઇંચથી વધારે વરસાદ જોવા મળ્યો છે. જેમાં હાલોલમાં 9.84 ઇંચ, ઉમરેઠમાં 4.72 ઇંચ, કડાણામાં 4.09 ઇંચ, સંતરામપુરમાં 3.98 ઇંચ, બોરસદમાં 3.07 ઇંચ, ઘોઘંબામાં 2.40 ઇંચ અને જાંબુઘોડામાં 2.10 ઇંચ વરસાદ વરસ્યો છે. આ સિવાય અન્ય 88 તાલુકામાં 1 થી લઇને 40 મીમી સુધી વરસાદ નોંધાયો છે.

► હવામાન વિભાગની આગાહી

હવામાન વિભાગની આગાહી પ્રમાણે 31 ઓગસ્ટને રવિવારે સાબકાંઠા, અરવલ્લી, મહેસાણા, મહિસાગર,અમદાવાદ, ખેડા, આણંદ, દાહોદ, પંચમહાલ, વડોદરા, ભરૂચ, છોટાઉદેપુર, નર્મદા, સુરત, તાપી, ડાંગ, નવસારી અને વલસાડમાં યલ્લો એલર્ટ સાથે ભારે વરસાદની આગાહી આપવામાં આવી છે. આ ઉપરાંતના અન્ય જિલ્લામાં કોઈ ચેતવણી આપવામાં આવી નથી.

► નર્મદા ડેમ 94 ટકા ભરાયો

સરદાર સરોવર નર્મદા ડેમની સપાટીમાં વધારો થયો છે. ઉપરવાસમાંથી 1,76,046 ક્યુસેક પાણીની આવક થઈ રહી છે. જ્યારે હાલ નર્મદા ડેમની સપાટી 136.64 મીટર પર પહોંચી છે. જ્યારે ડેમની મહત્તમ સપાટી 138.68 મીટર છે અને ડેમ 94 ટકા ભરાયો છે. નર્મદા ડેમના 15 ગેટ 1.85 મીટર ખોલવામાં આવ્યા છે. ડેમના 15 ગેટમાંથી નર્મદા નદીમાં પાણી છોડવામાં આવતાં કાંઠા વિસ્તાર ભરૂચ, નર્મદા અને વડોદરાના 27 ગામોને હાઈએલર્ટ કરવામાં આવ્યા છે.

Home Page- gujju news channel - Latest Gujarati News, તાજા ગુજરાતી સમાચાર, Latest Gujarati News LIVE, Online Gujarati News, Gujarati news headlines today, Gujarati News Channel